ಯೋಜನೆಗಳು

 

ಕನ್ನಡ ಸಾಹಿತ್ಯ ಪರಿಷತ್ತು, ಪರಿಷತ್ತಿನ ಮೂಲ ಕನ್ನಡ ಅಭಿವೃದ್ಧಿ ಆಶಯಗಳು ಮತ್ತು ಸಾಂಸ್ಕೃತಿಕ ಆಶಯಗಳಿಗೆ ಅನುಗುಣವಾಗಿ ಕಾರ್ಯಚಟುವಟಿಕೆಗಳನ್ನು ನಡೆಸುತ್ತಾ ಬಂದಿದ್ದು ಪ್ರಸ್ತುತ ಅವಶ್ಯಕತೆಗಳಿಗೆ ಅನುಗುಣವಾಗಿ ಹೊಸ ಹೊಸ ರೀತಿಯ ಯೋಜನೆಗಳನ್ನೂ ಸಹಾ ರೂಪಿಸುತ್ತಾ ಮುನ್ನಡೆದಿದೆ.

ಈ ಕಾರ್ಯಯೋಜನೆಗಳನ್ನು ಸಮರ್ಥವಾಗಿ ನಿರ್ವಹಿಸಲು ನಾಡಿನ ಗಣ್ಯರ ನೇತೃತ್ವದ ಉಪಸಮಿತಿಗಳನ್ನು ರಚಿಸಿ ಆ ಮೂಲಕ ಯೋಜನೆಗಳನ್ನು ಕಾರ್ಯಗತಗೊಳಿಸುವುದಕ್ಕೆ ಅಗತ್ಯ ಮಾರ್ಗದರ್ಶಿ ಸೂತ್ರಗಳನ್ನು ರೂಪಿಸಿ ಆ ಸೂತ್ರಗಳ ಅನ್ವಯ ಕಾರ್ಯಕ್ರಮಗಳನ್ನು ಸಮರ್ಥವಾಗಿ ನಡೆಸಲಾಗುತ್ತಿದೆ.

ಸಮರ್ಪಕ  ಅಂತರಜಾಲ  ತಾಣ

ಇಂದಿನ  ಆಧುನಿಕ    ಯುಗದಲ್ಲಿ ಯಾವುದೇ  ಭಾಷೆಯ    ಉಳಿವು, ಉಪಯೋಗ  ಮತ್ತು  ಬೆಳವಣಿಗೆಗೆ, ಆ  ಭಾಷೆ ಹೇಗೆ  ಅಂತರಜಾಲದಲ್ಲಿ ಲಭ್ಯವಾಗುತ್ತಿದೆ  ಎಂಬುದು ಕೂಡಾ ಅತ್ಯಗತ್ಯ ಎಂಬುದನ್ನು   ನಾವು  ಮನಗಂಡಿದ್ದೇವೆ. ನಮ್ಮ  ಕನ್ನಡ ಭಾಷೆಯನ್ನೂ ಅಂತರಜಾಲದಲ್ಲಿ  ಹೆಚ್ಚು  ಹೆಚ್ಚು  ಬಳಸುವತ್ತ ಬಲ ಒದಗಿಸಬೇಕು ಎಂಬ ನಿಟ್ಟಿನಲ್ಲಿ  ನಾವು ಶೀಘ್ರಗತಿಯಲ್ಲಿ  ಕಾರ್ಯೋನ್ಮುಖರಾಗಿದ್ದೇವೆ.  ಇದಕ್ಕಾಗಿ  ಕನ್ನಡ  ಸಾಹಿತ್ಯ ಪರಿಷತ್ತು ನೇಮಿಸಿರುವ  ‘ಕನ್ನಡಿಗರಿಗೆ  ಉದ್ಯೋಗ  ಹಾಗೂ  ವಿಜ್ಞಾನ  ತಂತ್ರಜ್ಞಾನ  ಸಂಬಂಧಿತ  ಆಧುನೀಕರಣ’ದ  ಬಗ್ಗೆ    ಪ್ರಖ್ಯಾತ  ವಿಮರ್ಶಕರು  ಹಾಗೂ  ಇಂಟೆಲ್, ಸಿಸ್ಕೋ,  ನಾವೆಲ್ , ಎಚ್ ಎಮ್ ಟಿ ಮುಂತಾದ ಅಂತರರಾಷ್ಟ್ರೀಯ ಮತ್ತು  ರಾಷ್ಟ್ರೀಯ  ಸಂಸ್ಥೆಗಳಲ್ಲಿ  ಸೇವೆ ಸಲ್ಲಿಸಿದವರೂ  ಆದ  ಎಸ್. ಆರ್. ವಿಜಯಶಂಕರ್  ಅವರು ಸಂಚಾಲಕರಾಗಿರುವ  ಗಣ್ಯರ   ಉಪಸಮಿತಿಯ ಸಲಹೆ ಸೂಚನೆಗಳನ್ನು  ತ್ವರಿತಗತಿಯಲ್ಲಿ ಅನುಷ್ಠಾನಗೊಳಿಸುತ್ತಿದೆ.     ಇದರ  ದ್ಯೋತಕವಾಗಿ  ಅತ್ಯಂತ  ಕಡಿಮೆ ಅವಧಿಯಲ್ಲೇ   ನಾವು  ನವೀಕರಿಸಿರುವ    ಈ ತಾಣದ  ಮೂಲಕ  ಕನ್ನಡ  ಜನ ಸಮೂಹದೊಡಗಿನ  ಬಾಂಧವ್ಯವನ್ನು  ನಿರಂತರವಾಗಿ  ಪೋಷಿಸಿ ಅಭಿವೃದ್ಧಿಪಡಿಸುವುದು  ಮತ್ತು  ಕನ್ನಡದ  ಉಪಯೋಗವನ್ನು  ಸಮರ್ಥವಾಗಿ  ವಿಸ್ತರಿಸುವುದು ನಮ್ಮ  ಅಭಿಲಾಷೆಯಾಗಿದೆ.

ಈ  ಅಂತರಜಾಲ ತಾಣದ  ಅಭಿವೃದ್ಧಿಯ  ಮೊದಲ  ಹಂತದಲ್ಲಿ  ಪರಿಷತ್ತಿನ ಒಂದು  ಶತಮಾನದ  ಸಾಂಸ್ಕೃತಿಕ ಪರಂಪರೆ ಮತ್ತು  ಪ್ರಸಕ್ತ ಕಾರ್ಯಚಟುವಟಿಕೆಗಳ   ಕುರಿತಾದ  ಸಮಗ್ರ  ಮಾಹಿತಿ  ಇದೀಗ  ತಮ್ಮ  ಮುಂದಿದೆ.  ಪರಿಷತ್ಪತ್ರಿಕೆ  ‘ಕನ್ನಡ ನುಡಿ’  ಸಹಾ  ಇಲ್ಲಿ  ಲಭ್ಯವಾಗುತ್ತಿದೆ.

ಅನ್ನದ ಭಾಷೆಯಾಗಿ ಕನ್ನಡ

ನಮ್ಮ ಮಹತ್ವಾಕಾಂಕ್ಷೆಯ ಯೋಜನೆಗಳಲ್ಲಿ ಒಂದಾದ   ‘ಅನ್ನದ  ಭಾಷೆಯಾಗಿ  ಕನ್ನಡ’ ಯೋಜನೆಯಡಿಯಲ್ಲಿ ಕನ್ನಡಿಗರಿಗೆ  ಉದ್ಯಾವಕಕಾಶ  ಸೃಷ್ಟಿಯ ದೆಸೆಯಲ್ಲಿ   ಮಾಹಿತಿ ಕೋಶವನ್ನು ಪರಿಷತ್ತು  ನಿರ್ಮಿಸಿದೆ.   ಕನ್ನಡ ನಾಡಿನಲ್ಲಿರುವ  ಸಂಸ್ಥೆಗಳಲ್ಲಿನ  ನೌಕರಿಗಳಲ್ಲಿ,  ವಿಶೇಷವಾಗಿ  ಸಿ ಮತ್ತು ಡಿ ದರ್ಜೆಯ  ನೌಕರಿಗಳಿಗೆ  ಕನ್ನಡಿಗರು  ಹೆಚ್ಚು ಸಂಖ್ಯೆಯಲ್ಲಿ  ಭರ್ತಿಯಾಗುವಂತೆ  ಮಾಡುವ ಉದ್ದೇಶದಿಂದ   ಈ  ಉದ್ಯೋಗ ಮಾಹಿತಿಕೋಶ  ರಚನೆಯಾಗಿದೆ.  ಈ ಮೂಲಕ  ಯೋಗ್ಯ  ಅಭ್ಯರ್ಥಿಗಳಿಂದ  ಮಾಹಿತಿ ಪಡೆದು ಬಹುರಾಷ್ಟ್ರೀಯ  ಕಂಪನಿಗಳೂ  ಸೇರಿದಂತೆ  ವಿವಿಧ  ಕಂಪೆನಿಗಳ  ಮುಖ್ಯಸ್ಥರಿಗೆ    ವಿವರಗಳನ್ನು  ರವಾನಿಸುವುದು  ಹಾಗೂ  ಆ ಮೂಲಕ  ಕನ್ನಡಿಗರಿಗೆ  ಹೆಚ್ಚು ಸಂಖ್ಯೆಯಲ್ಲಿ  ಉದ್ಯೋಗ ಲಭ್ಯವಾಗುವಂತೆ  ಪ್ರಯತ್ನಿಸುವುದು  ನಮ್ಮ  ಗುರಿಯಾಗಿದೆ.

ಪರಿಷತ್ತಿನ  ನಿಘಂಟು ಮತ್ತು  ಪ್ರಕಟಿತ  ಗ್ರಂಥಗಳ  ಡಿಜಿಲೀಕರಣ

ಕನ್ನಡ  ಸಾಹಿತ್ಯ  ಪರಿಷತ್ತಿನ    ನಿಘಂಟನ್ನು  ಡಿಜಿಟಕೀಕರಣಗೊಳಿಸುವ ಕಾರ್ಯದ ಪ್ರಥಮ ಹೆಜ್ಜೆಯಾಗಿ  ಪರಿಷತ್ತಿನ  ಸಂಕ್ಷಿಪ್ತ  ನಿಘಂಟನ್ನು ಸದ್ಯದಲ್ಲೇ  ಈ  ಅಂತರಜಾಲ  ತಾಣದಲ್ಲಿ  ಅಳವಡಿಸುವ  ಕಾರ್ಯ ಸಹಾ  ಕ್ಷಿಪ್ರ  ಪ್ರಗತಿಯಲ್ಲಿದೆ.   ಪುಸ್ತಕ  ಮಾರಾಟ, ಪರಿಷತ್ತಿನ  ಶಿಕ್ಷಣ  ವ್ಯವಸ್ಥೆಗಳಿಗೆ  ಬೇಕಾದ  ಅವಶ್ಯ ಸಂಪರ್ಕಗಳು,  ಸದಸ್ಯತ್ವ ಸ್ವೀಕಾರ,  ಸಭಾಂಗಣಗಳ  ಕಾಯ್ದಿರಿಸುವಿಕೆ,  ಮುಂತಾದ ಪರಿಷತ್ತಿನ  ವ್ಯವಸ್ಥೆಗಳಿಗೆ  ಸಹಾ  ಈ ತಾಣ  ಅಗತ್ಯ  ಸಂಪರ್ಕ ಕಲ್ಪಿಸಲಿದೆ.   ಪರಿಷತ್ತು  ಪ್ರಕಟಿಸಿರುವ  ಪರಿಷತ್ತಿನ ಹಕ್ಕುಸ್ವಾಮ್ಯವುಳ್ಳ  ಕೃತಿಗಳ  ಡಿಜಲೀಕರಣಗೊಳಿಸುವ  ಯೋಜನೆ  ಸಹಾ ಉಪಸಮಿತಿಯ ಮಟ್ಟದ  ಪರಿಶೀಲನೆಯಲ್ಲಿದೆ.

ಅಂತರಜಾಲ  ತಂತ್ರಜ್ಞಾನ ಬಳಕೆ  ಸಮಾವೇಶ

ಸಮರ್ಥ ಕನ್ನಡ  ಗಣಕೀಕರಣದ  ಲಾಭಗಳು  ಸಾಹಿತ್ಯ ಮತ್ತು  ಸಾಂಸ್ಕ್ರತಿಕ  ಲೋಕಕ್ಕೆ  ಒದಗಬೇಕು ಹಾಗೂ ಇದಕ್ಕಾಗಿ  ಕನ್ನಡವನ್ನು  ಅಂತರಜಾಲದಲ್ಲಿ  ಬಳಸುತ್ತಿರುವ  ಮನಗಳು  ಒಂದುಗೂಡಬೇಕು,  ಸಾಹಿತ್ಯ  ಮತ್ತು ತಂತ್ರಜ್ಞಾನ,  ಯುವ ಪೀಳಿಗೆ ಮತ್ತು  ಹಿರಿಯ ಪೀಳಿಗೆ  ಹೀಗೆ  ವಿವಿಧ  ಬಾಂಧ್ಯವ್ಯಗಳು  ಬೆಸೆಯಬೇಕು  ಎಂಬ ಮಹತ್ವದ  ಆಶಯದಲ್ಲಿ  ಪರಿಷತ್ತು  ಸದ್ಯದಲ್ಲೇ  ತಜ್ಞರ  ನೇತೃತ್ವದಲ್ಲಿ ಒಂದು ಸಮಾವೇಶವನ್ನೂ  ಆಯೋಜಿಸಲಿದೆ.

ಪ್ರಸ್ತುತ  ಸನ್ನಿವೇಶದಲ್ಲಿ ಕನ್ನಡಕ್ಕಾಗಿ  ಮಾರ್ಗದರ್ಶಿ ಸೂತ್ರಗಳ ಚಿಂತನೆ

ಡಾ. ಮನು ಬಳಿಗಾರ್  ಅವರು  ಅಧ್ಯಕ್ಷರಾಗಿ  ಅಧಿಕಾರವಹಿಸಿಕೊಂಡ  ಕ್ಷಣಗಳಿಂದಲೇ  ಕನ್ನಡ ಸಾಹಿತ್ಯ ಪರಿಷತ್ತು ವಿವಿಧ  ಮುಖಗಳಲ್ಲಿ  ಕನ್ನಡದ  ಕುರಿತಾದ  ನಿರಂತರವಾದ  ಚಟುವಟಿಕೆಗಳನ್ನು ನಡೆಸುವುದರತ್ತ  ಪ್ರಧಾನ ಆದ್ಯತೆ  ನೀಡಿದ್ದಾರೆ.  ಕನ್ನಡ  ಸಾಹಿತ್ಯ ಪರಿಷತ್ತು  ಮುಂದಿನ ಮೂರು ವರ್ಷಗಳ ಅವಧಿಯಲ್ಲಿ ಸಾರ್ಥಕ ಹಾಗೂ  ದಿಟ್ಟ ಹೆಜ್ಜೆಗಳನ್ನಿಡಬೇಕೆಂಬ ಸದುದ್ದೇಶದಿಂದ   ಕರೆದ ‘ಗಣ್ಯರ  ಸಭೆ’ಗೆ ಆಹ್ವಾನಿಸಲ್ಪಟ್ಟ  ಬಹುತೇಕ  ಗಣ್ಯರು  ಸಭೆಗೆ  ಆಗಮಿಸಿ  ತಮ್ಮ  ಅಮೂಲ್ಯ ಸಲಹೆಗಳನ್ನು  ನೀಡಿದರು.  ಈ   ಮೌಲಿಕ  ಅಭಿಪ್ರಾಯಗಳನ್ನು ಮಾರ್ಗದರ್ಶಿ ಸೂತ್ರಗಳನ್ನಾಗಿ  ಅಳವಡಿಸಿಕೊಂಡು ಮುನ್ನಡೆಯಬೇಕು  ಎಂಬುದು  ಪರಿಷತ್ತಿನ  ಅಧ್ಯಕ್ಷರ     ಹಂಬಲವಾಗಿದೆ.  ಗಣ್ಯರ ಸಭೆಯಿಂದ  ಸ್ಫೂರ್ತಿ ಪಡೆದು ಕನ್ನಡ  ಶಿಕ್ಷಣ ಮಾಧ್ಯಮ  ಮತ್ತು  ನ್ಯಾಯಾಲಯಗಳ  ತೀರ್ಪಿನ ಬಗ್ಗೆ ಸಮಗ್ರವಾಗಿ ಚರ್ಚಿಸಲು ಶಿಕ್ಷಣ ತಜ್ಞರು, ನ್ಯಾಯಾಧೀಶರು ಹಾಗೂ  ಹಿರಿಯ ಸಾಹಿತಿಗಳ  ಸಭೆ  ಆಯೋಜಿಸಲಾಗಿತ್ತು.  ನಿವೃತ್ತ  ಉಚ್ಚ ನ್ಯಾಯಾಲಯದ ಮುಖ್ಯ  ನ್ಯಾಯಾಧೀಶರಾದ ಶ್ರೀ ರಾಮಾಜೋಯಿಸ್, ನ್ಯಾಯಮೂರ್ತಿ ಶ್ರೀ. ಎ. ಜೆ. ಸದಾಶಿವ, ನ್ಯಾಯಮೂರ್ತಿ  ಶ್ರೀ ನಾಗಮೋಹನದಾಸ್ ಸೇರಿದಂತೆ ಹಲವಾರು ಹಿರಿಯ ಗಣ್ಯರು ಈ  ಸಭೆಯಲ್ಲಿ  ಭಾಗವಹಿಸಿ  ಮೌಲಿಕ  ಸಲಹೆಗಳನ್ನು ನೀಡಿದ್ದಾರೆ.

ವಿಶಿಷ್ಟ  ಉಪಸಮಿತಿಗಳು

ಕನ್ನಡ  ಪರಿಷತ್ತಿನಲ್ಲಿ ಹಲವಾರು  ಉಪಸಮಿತಿಗಳಿವೆ.  ಇದಕ್ಕೆ  ಸೇರಿದಂತೆ ಇನ್ನೂ  ಹಲವು  ಉಪಸಮಿತಿಗಳನ್ನು  ರಚಿಸಲಾಗಿದೆ.  ಕನ್ನಡ  ಸಾಹಿತ್ಯ ಪರಿಷತ್ತು ನಡೆಸುವ  ಪ್ರವೇಶ, ಜಾಣ, ರತ್ನ ಪರೀಕ್ಷೆಗಳಿಗೆ ನಿಗದಿಪಡಿಸಿದ  ‘ಪಠ್ಯ’ ಪರಿಷ್ಕರಣೆಗೊಳಿಸಲು  ಹಿರಿಯ ಕವಿ, ೮೧ನೇ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷರಾದ ಡಾ. ಸಿದ್ಧಲಿಂಗಯ್ಯನವರ  ಅಧ್ಯಕ್ಷತೆಯಲ್ಲಿ  ಪಠ್ಯ ಪುಸ್ತಕ ಪರಿಷ್ಕರಣಾ ಸಮಿತಿ ಕಾರ್ಯನಿರ್ವಹಿಸುತ್ತಿದೆ.  ನಿಬಂಧನೆ ಮತ್ತು  ಚುನಾವಣಾ  ಸುಧಾರಣಾ ಉಪಸಮಿತಿಗೆ  ನಿವೃತ್ತ  ಜಿಲ್ಲಾಧಿಕಾರಿ ಶ್ರೀ  ಎನ್. ಕೆ.  ನಾರಾಯಣ ಅವರು  ಗೌರವ ಸಂಚಾಲಕರಾಗಿದ್ದು  ಯಾವುದೇ  ಫಲಾಪೇಕ್ಷೆಯಿಲ್ಲದೆ  ಕಾರ್ಯ ಪ್ರವೃತ್ತರಾಗಿದ್ದಾರೆ.   ಈಗಾಗಲೇ  ಪ್ರಸ್ತಾಪಿಸಿರುವಂತೆ ಶ್ರೀ  ಎಸ್.  ಆರ್.  ವಿಜಯಶಂಕರ್  ಅವರು  ಸಂಚಾಲಕರಾಗಿರುವ  ‘ಕನ್ನಡಿಗರಿಗೆ  ಉದ್ಯೋಗ  ಹಾಗೂ  ವಿಜ್ಞಾನ  ತಂತ್ರಜ್ಞಾನ  ಸಂಬಂಧಿತ  ಆಧುನೀಕರಣ’ದ ಕುರಿತಾದ  ಉಪಸಮಿತಿ  ಸಹಾ  ಭರದಿಂದ  ಕಾರ್ಯನಿರ್ವಹಿಸುತ್ತಿದೆ.

ಶತಮಾನೋತ್ಸವ  ಭವನ

ನೆನೆಗುದಿಗೆ  ಬಿದ್ದಿದ್ದ  ಶತಮಾನೋತ್ಸವ ಭವನ ನಿರ್ಮಾಣಕಾರ್ಯ  ಭರದಿಂದ  ಸಾಗುತ್ತಿದೆ.

ಸಂಶೋಧನೆ

ಡಾ. ಎಂ. ಚಿದಾನಂದಮೂರ್ತಿಯವರ ಇತ್ತೀಚಿನ  ಹೊಸ ಶೋಧವನ್ನು ಅನಾವರಣಗೊಳಿಸುವ  “ಕನ್ನಡಿಗರ  ಅಸ್ಮಿತೆಯ  ತಲಕಾವೇರಿ  ಚಂದ್ರವಳ್ಳಿ ಕಣಿವೆ”  ಎಂಬ  ವಿಶೇಷ  ಉಪನ್ಯಾಸ ನಡೆದಿದ್ದು  ಈ ಮಹತ್ವದ ಉಪನ್ಯಾಸವು  ಕೃತಿಯ  ರೂಪದಲ್ಲೂ  ಸದ್ಯದಲ್ಲೇ  ಹೊರಹೊಮ್ಮಲಿದೆ.

ಸಾಧಕರೊಡನೆ ಸಂವಾದ

ಕನ್ನಡ  ಲೇಖಕಿಯರ  ಸಂಘದ  ಸಹಯೋಗದೊಂದಿಗೆ  ಪರಿಷತ್ತು  ‘ಸಾಧಕರೊಡನೆ  ಸಂವಾದ’  ಎಂಬ  ವಿನೂತನ  ಕಾರ್ಯಕ್ರಮವನ್ನು ಹಮ್ಮಿಕೊಂಡಿದ್ದು ಹಿರಿಯ ಲೇಖಕಿ , ಇನ್ಫೋಸಿಸ್ ಫೌಂಡೇಷನ್ ಅಧ್ಯಕ್ಷರಾದ ಡಾ. ಸುಧಾಮೂರ್ತಿ  ಅವರು  ಈ  ಕಾರ್ಯಕ್ರಮವನ್ನು ಉದ್ಘಾಟಿಸಿದ್ದಾರೆ.     ಹಿರಿಯ ಸಾಹಿತಿಗಳಾದ ಡಾ. ಲೀಲಾದೇವಿ ಆರ್ ಪ್ರಸಾದ್,  ಪ್ರೊ. ಜಿ. ವೆಂಕಟಸುಬ್ಬಯ್ಯ ,  ಡಾ.  ವೈದೇಹಿ, ವೈದ್ಯರಾದ ಡಾ. ಸಿ. ಎನ್. ಮಂಜುನಾಥ್, ಉಭಯಗಾನ ವಿದುಷಿ ಡಾ. ಶ್ಯಾಮಲಾ ಜಿ. ಭಾವೆ ಅವರೊಂದಿಗೆ   ಐದು  ಕಾರ್ಯಕ್ರಮಗಳು ಯಶಸ್ವಿಯಾಗಿ  ನಡೆದಿವೆ.

ದತ್ತಿ ಕಾರ್ಯಕ್ರಮಗಳು

ಕಳೆದ  ವರ್ಷದಲ್ಲಿ ಕಾರಣಾಂತರಗಳಿಂದ   ನಡೆಯದ ಎಲ್ಲ  ದತ್ತಿ  ಕಾರ್ಯಕ್ರಮಗಳನ್ನೂ  ಪ್ರಸಕ್ತ  ವರ್ಷದ  ದತ್ತಿ ಕಾರ್ಯಕ್ರಮಗಳೊಂದಿಗೆ  ಸೇರಿಸಿ  ಯಶಸ್ವಿಯಾಗಿ  ನಡೆಸಲಾಗುತ್ತಿದೆ.

ಶಾಸ್ತೀಯ ಪಠ್ಯಗಳ ಓದು-ಅಧ್ಯಯನ ತರಬೇತಿ

ಮೈಸೂರಿನ  ಶಾಸ್ತ್ರೀಯ  ಕನ್ನಡ ಅತ್ಯುನ್ನತ  ಅಧ್ಯಯನ ಕೇಂದ್ರದೊಂದಿಗೆ ಸೇರಿ  ಕನ್ನಡ  ಸಾಹಿತ್ಯ  ಪರಿಷತ್ತು  ಕರ್ನಾಟಕದ  ನಾಲ್ಕು ಕಂದಾಯ  ವಿಭಾಗಗಳಲ್ಲಿ  ಕನ್ನಡ  ಶಾಸ್ತೀಯ ಪಠ್ಯಗಳ ಓದು-ಅಧ್ಯಯನ ತರಬೇತಿ  ಶಿಬಿರ ಆಯೋಜಿಸುತ್ತಿದೆ.

ಹೊರನಾಡ ಕನ್ನಡಿಗರ ರಾಷ್ಟ್ರೀಯ ಸಮಾವೇಶ

ಕನ್ನಡ ಸಾಹಿತ್ಯ ಪರಿಷತ್ತಿನ ಇತಿಹಾಸದಲ್ಲಿ ಪ್ರಪ್ರಥಮ ಬಾರಿಗೆ ‘ಹೊರನಾಡ ಕನ್ನಡಿಗರ ರಾಷ್ಟ್ರೀಯ ಸಮಾವೇಶವು’ ಡಾ. ಮನು ಬಳಿಗಾರ್ ಅವರ ನೇತೃತ್ವದಲ್ಲಿ ಅಕ್ಟೋಬರ್  ೮,೯ ರಂದು ನವದೆಹಲಿಯಲ್ಲಿ ಅತ್ಯಂತ ಯಶಸ್ವಿಯಾಗಿ ನಡೆದಿದೆ.   ಮಧ್ಯಪ್ರದೇಶದ ಅಮರಕಂಟಕದ ಇಂದಿರಾಗಾಂಧೀ  ರಾಷ್ಟ್ರೀಯ  ಬುಡಕಟ್ಟು ವಿಶ್ವವಿದ್ಯಾಲಯ ಹಾಗೂ ದೆಹಲಿ ಕರ್ನಾಟಕ ಸಂಘಗಳು  ಈ  ಸಮಾವೇಶಕ್ಕೆ ಪರಿಷತ್ತಿನೊಂದಿಗೆ ಕೈಜೋಡಿಸಿದ್ದವು.  ಕಡೇ ಪಕ್ಷ ಎರಡು ವರ್ಷಗಳಿಗೊಮ್ಮೆಯಾದರೂ ಇಂತಹ ಹೊರನಾಡ ಕನ್ನಡಿಗರ ರಾಷ್ಟ್ರೀಯ ಸಮಾವೇಶಗಳನ್ನು ನಡೆಸುವ ಯೋಜನೆಗಳನ್ನು ಪರಿಷತ್ತು ಹೊಂದಿದೆ.

ಸಾಹಿತ್ಯ ಕಾರ್ಯಕ್ರಮಗಳೊಡನೆ  ಸಾಂಸ್ಕೃತಿಕ  ಕಾರ್ಯಕ್ರಮಗಳು

ಸಾಹಿತ್ಯ ಸಾಹಿತ್ಯಕ ಕಾರ್ಯಕ್ರಮಗಳ  ಜೊತೆಯಲ್ಲಿ  ಭಾವಗೀತೆ, ಜಾನಪದಗೀತೆ,  ಕನ್ನಡ ಗೀತೆಗಳಂತಹ ಸುಗಮ ಸಂಗೀತ  ಕಾರ್ಯಕ್ರಮಗಳನ್ನು ಸಹಾ  ಏರ್ಪಡಿಸುವು  ಪದ್ಧತಿಯನ್ನು  ಜಾರಿಗೊಳಿಸಲಾಗಿದೆ.

ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್  ಪದಾಧಿಕಾರಿಗಳಿಗೆ  ತರಬೇತಿ.

ಜಿಲ್ಲಾ  ಕನ್ನಡ  ಸಾಹಿತ್ಯ  ಪರಿಷತ್ತಿಗೆ  ನೂತನವಾಗಿ  ಆಯ್ಕೆಗೊಂಡಿರುವ ಪದಾಧಿಕಾರಿಗಳಿಗೆ ತರಬೇತಿ ಕಾರ್ಯಕ್ರಮವನ್ನು  ಮಾಜಿ  ಮುಖ್ಯಮಂತ್ರಿಗಳಾದ  ವೀರಪ್ಪ  ಮೊಯ್ಲಿ ಮತ್ತು ಪರಿಷತ್ತಿನ  ಮಾಜಿ ಅಧ್ಯಕ್ಷರಾದ  ಗೊ. ರು. ಚನ್ನಬಸಪ್ಪನವರ  ಉಪಸ್ಥಿತಿಯಲ್ಲಿ  ನೆರವೇರಿಸಲಾಯಿತು.

ಜಿಲ್ಲಾ  ಕನ್ನಡ ಸಾಹಿತ್ಯ  ಸಮ್ಮೇಳನಗಳು  ಹಾಗೂ  ಇತರ  ಕಾರ್ಯಕ್ರಮಗಳು

ಕರ್ನಾಟಕದಲ್ಲಿನ   ಜಿಲ್ಲಾ ಸಮಿತಿಗಳು  ಜಿಲ್ಲಾ  ಮಟ್ಟದಲ್ಲಿ  ಜಿಲ್ಲಾ  ಸಾಹಿತ್ಯ ಸಮ್ಮೇಳನಗಳನ್ನೂ, ವಿವಿಧ  ಕಾರ್ಯಕ್ರಮಗಳನ್ನೂ  ನಡೆಸುತ್ತಿವೆ.

೮೨ನೇ ಅಖಿಲ ಭಾರತ  ಕನ್ನಡ ಸಾಹಿತ್ಯ ಸಮ್ಮೇಳನ

ಪ್ರಸಕ್ತ ರಾಯಚೂರಿನಲ್ಲಿ ಜರುಗುತ್ತಿರುವ ೮೨ನೇ ಅಖಿಲ  ಭಾರತ  ಕನ್ನಡ  ಸಾಹಿತ್ಯ ಸಮ್ಮೇಳನವನ್ನು ಯಶಸ್ವಿಯಾಗಿ  ನಡೆಸಲು  ಪರಿಷತ್ತು  ಆದ್ಯತೆಯ ಮೇರೆಗೆ ಕಾರ್ಯಪ್ರವೃತ್ತವಾಗಿದೆ.

Tag: Yojanegalu