ಕನ್ನಡಕೆ ಹೋರಾಡು ಕನ್ನಡದ ಕಂದಾ

ಸಾಹಿತ್ಯ: ಕುವೆಂಪು

 

ಕನ್ನಡಕೆ ಹೋರಾಡು

ಕನ್ನಡದ ಕಂದಾ;

ಕನ್ನಡವ ಕಾಪಾಡು

ನನ್ನ ಆನಂದಾ!

ಜೋಗುಳದ ಹರಕೆಯಿದು

ಮರೆಯದಿರು, ಚಿನ್ನಾ;

ಮರೆತೆಯಾದರೆ ಅಯ್ಯೊ

ಮರೆತಂತೆ ನನ್ನ!

 

ಮೊಲೆಯ ಹಾಲೆಂತಂತೆ

ಸವಿಜೇನು ಬಾಯ್ಗೆ;

ತಾಯಿಯಪ್ಪುಗೆಯಂತೆ

ಬಲುಸೊಗಸು ಮೆಯ್ಗೆ;

ಗುರುವಿನೊಳ್ನುಡಿಯಂತೆ

ಶ್ರೇಯಸ್ಸು ಬಾಳ್ಗೆ;

ತಾಯ್ನುಡಿಗೆ ದುಡಿದು ಮಡಿ,

ಇಹಪರಗಳೇಳ್ಗೆ!

 

ರನ್ನ ಪಂಪರ ನಚ್ಚು

ಕನ್ನಡದ ಸೊಲ್ಲು;

ಬಸವದೇವನ ಮೆಚ್ಚು,

ಹರಿಹರನ ಗೆಲ್ಲು;

ನಾರಣಪ್ಪನ ಕೆಚ್ಚು

ಬತ್ತಳಿಕೆ ಬಿಲ್ಲು;

ಕನ್ನಡವ ಕೊಲುವ ಮುನ್

ಓ ನನ್ನ ಕೊಲ್ಲು!

 

ನೆವವು ಏನಾದರೇನ್,

ಹೊರನುಡಿಯು ಹೊರೆಯೈ;

ನಿನ್ನ ನಾಡೊಡೆಯ ನೀನ್;

ವೈರಿಯನು ತೊರೆಯೈ.

ಕನ್ನಡದ ನಾಡಿನಲಿ

ಕನ್ನಡವ ಮೆರೆಯೈ;

 

ತಾಯ್ಗಾಗಿ ಹೋರಾಡಿ

ತಾಯ್ನುಡಿಯ ಪೊರೆಯೈ!

ಕನ್ನಡಕೆ ಬಂದಿಳಿಕೆ

ಹಿಡಿಯುತಿಹುದಿಂದು;

ನೀ ನಿದ್ದೆ ಮಾಡಿದರೆ

ಹಾಕುವುದು ಕೊಂದು!

ಎದ್ದೇಳೊ, ಕಂದಯ್ಯ,

ಕತ್ತಿಯನು ಕೊಳ್ಳೊ!

 

ತಳಿರು ವೇಷದ ರೋಗ

ಬಂದಿಳಿಕೆ, ತಳ್ಳೊ!

ದಮ್ಮಯ್ಯ, ಕಂದಯ್ಯ,

ಬೇಡುವೆನು ನಿನ್ನ;

ಕನ್ನಡಮ್ಮನ ಹರಕೆ,

ಮರೆಯದಿರು, ಚಿನ್ನಾ!

ಮರೆತೆಯಾದರೆ ಅಯ್ಯೊ,

ಮರೆತಂತೆ ನನ್ನ;

ಹೋರಾಡು ಕನ್ನಡಕೆ

ಕಲಿಯಾಗಿ, ರನ್ನಾ!