ಪರಿಷತ್ತಿನ ೬ನೆ ನಿಬಂಧನೆಯ ಅನುಸಾರ:

(೧) ಪರಿಷತ್ತಿನ ಧ್ಯೇಯೋದ್ದೇಶಗಳನ್ನು ಒಪ್ಪಿಕೊಂಡು ಅದರ ನಿಯಮ-ನಿಬಂಧನೆಗಳಿಗೆ ಬದ್ಧರಾಗುವ ಮತ್ತು ಕೆಳಕಾಣಿಸಿದ ಅರ್ಹತೆಯುಳ್ಳವರು ಪರಿಷತ್ತಿನ ಸದಸ್ಯತ್ವ ಪಡೆಯಬಹುದು.

(ಅ) ೧೮ ವರ್ಷಗಳ ವಯಸ್ಸನ್ನು ಪೂರ್ಣಗೊಳಿಸಿದವರು.

(ಆ) ವಿದ್ಯಾರ್ಹತೆ : ಕನ್ನಡ ವಿಷಯವನ್ನು ಒಳಗೊಂಡಂತೆ ಕನಿಷ್ಠ ಪ್ರಾಥಮಿಕ ಶಿಕ್ಷಣ ಪಡೆದ ಅಥವಾ ತತ್ಸಮಾನ ಪರೀಕ್ಷೆಯಲ್ಲಿ ಉತ್ತೀರ್ಣರಾದವರು ಅಥವಾ ಸದಸ್ಯತ್ವ ವಿದ್ಯಾರ್ಹತೆಗೆ ಸಂಬಂಧಿಸಿದಂತೆ ಪರಿಷತ್ತು ನಡೆಸುವ ‘ಸರಳ ಕನ್ನಡ ಪರೀಕ್ಷೆ’ಯಲ್ಲಿ ಉತ್ತೀರ್ಣರಾದವರು. ಕನ್ನಡ ಓದು-ಬರಹ ಬಾರದ ವ್ಯಕ್ತಿಗಳು ಈಗಾಗಲೇ ಆಜೀವ ಸದಸ್ಯರಾಗಿದ್ದಲ್ಲಿ, ಅಂಥವರ ಸದಸ್ಯತ್ವ ಅಬಾಧಿತವಾಗಿ ಮುಂದುವರೆಯತಕ್ಕದ್ದು.

ವಿದ್ಯಾರ್ಹತೆಯಿಂದ ವಿನಾಯಿತಿ : ಜಾನಪದ, ನೃತ್ಯ, ಸಂಗೀತ, ರಂಗಭೂಮಿ, ಚಿತ್ರರಂಗ, ಚಿತ್ರಕಲೆ, ಯಕ್ಷಗಾನ ಮುಂತಾದ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆಗೈದ ಕಲಾವಿದರು, ಕೃಷಿಕರು, ಕುಶಲಕರ್ಮಿಗಳು, ಕಾರ್ಮಿಕರು, ಇನ್ನಿತರೆ ಸಾಮಾನ್ಯ ಹಾಗೂ ಕನ್ನಡ ನಾಡು, ನುಡಿ, ನೆಲ, ಜಲ - ಇವುಗಳ ರಕ್ಷಣೆಗಾಗಿ ಶ್ರಮಿಸಿದ ಓದು, ಬರಹ ಬಾರದ ಕನ್ನಡಿಗರು, ಪರಿಷತ್ತಿನ ಸದಸ್ಯತ್ವವನ್ನು ಬಯಸಿ ಅರ್ಜಿ ಸಲ್ಲಿಸಿದಲ್ಲಿ, ಕನಿಷ್ಠ ವಿದ್ಯಾರ್ಹತೆಯ ಈ ನಿಯಮ ಅನ್ವಯವಾಗತಕ್ಕದ್ದಲ್ಲ.

(ಇ) ಸದಸ್ಯತ್ವ ಬಯಸುವ ವ್ಯಕ್ತಿ, ತನ್ನ ವಿರುದ್ಧ ಯಾವುದೇ ನ್ಯಾಯಾಲಯದಲ್ಲಿ ಯಾವುದೇ ಅಪರಾಧಿಕ ಪ್ರಕರಣ ವಿಚಾರಣೆಗೆ ಬಾಕಿ ಇರುವುದಿಲ್ಲ ಎಂಬುದಾಗಿ ಸ್ವ-ಘೋಷಿತ ಪ್ರಮಾಣಪತ್ರವನ್ನು ಸಲ್ಲಿಸತಕ್ಕದ್ದು. ಆದರೆ, ಇಂತಹ ವ್ಯಕ್ತಿ ಕನ್ನಡ ನಾಡು, ನುಡಿ, ನೆಲ, ಜಲ ಇವುಗಳ ರಕ್ಷಣೆಯ ಸಂಬಂಧವಾಗಿ ಜರುಗಿದ ಹೋರಾಟಗಳಲ್ಲಿ ಭಾಗಿಯಾಗಿದ್ದನೆನ್ನುವ ಕಾರಣಕ್ಕಾಗಿ, ಅಂತಹ ಅಪರಾಧಿಕ ಪ್ರಕರಣ ದಾಖಲಾಗಿದ್ದರೆ ಈ ನಿಯಮ ಅನ್ವಯಿಸುವುದಿಲ್ಲ. ಈ ಸಂಬಂಧ ಸೂಕ್ತ ದಾಖಲೆಯನ್ನು ಒದಗಿಸತಕ್ಕದ್ದು.

(ಈ) ಮತದಾರರ ಹೆಸರಿಗೆ ಆಧಾರ್ ಕಾರ್ಡ್ ಜೋಡಣೆ ಮಾಡುವ ಸಂಬಂಧವಾಗಿ ಕಾನೂನು ಜಾರಿಗೆ ಬಂದಲ್ಲಿ, ಅದರನ್ವಯ ಅದು ಜಾರಿಗೆ ಬಂದ ದಿನಾಂಕದಂದು ಇರುವ ಪರಿಷತ್ತಿನ ಸದಸ್ಯರಿಗೆ ಕೊಡಮಾಡುವ ಗುರುತಿನ ಚೀಟಿ ‘ಸ್ಮಾರ್ಟ್ ಕಾರ್ಡ್’ಗೆ ಆಧಾರ್ ಕಾರ್ಡ್ ಜೋಡಣೆ ಮಾಡತಕ್ಕದ್ದು.

(ಉ) ಪರಿಷತ್ತಿನ ಧ್ಯೇಯೋದ್ದೇಶಗಳನ್ನು ಒಪ್ಪಿಕೊಂಡು ಅದರ ನಿಯಮ-ನಿಬಂಧನೆಗಳಿಗೆ ಬದ್ಧವಾಗುವ ಯಾವುದೇ ಕನ್ನಡ ಸಂಘ-ಸಂಸ್ಥೆ, ಪರಿಷತ್ತಿನ ಅಂಗಸಂಸ್ಥೆಯಾಗಲು ಬಯಸಿ ಅರ್ಜಿ ಸಲ್ಲಿಸಿದಲ್ಲಿ ಅಂತಹ ಅರ್ಜಿಯೊಂದಿಗೆ ಸಂಸ್ಥೆಯ ನೋಂದಣಿ ಪತ್ರ ಮತ್ತು ಸಂಸ್ಥೆಯು ಅಂಗೀಕರಿಸಿದ ನಡೆವಳಿಯ ದೃಢೀಕೃತ ಪ್ರತಿಗಳನ್ನು ಸಲ್ಲಿಸಿ ನಿಗದಿತ ಶುಲ್ಕವನ್ನು ಪಾವತಿಸಿ ಸದಸ್ಯತ್ವ ಪಡೆಯಬಹುದು. ಅಂತಹ ಸಂಸ್ಥೆಯು ಸಕ್ಷಮ ಪ್ರಾಧಿಕಾರದಲ್ಲಿ ನೋಂದಣಿಗೊಂಡಿರದಿದ್ದಲ್ಲಿ ಪರಿಷತ್ತಿನ ಸದಸ್ಯತ್ವ ಪಡೆಯಬಹುದಾದರೂ ಅದು ಯಾವುದೇ ಚುನಾವಣೆಯಲ್ಲೂ ಮತ ಚಲಾಯಿಸುವ ಹಕ್ಕನ್ನು ಹೊಂದಿರುವುದಿಲ್ಲ.

ಪರಿಷತ್ತಿನ ಸದಸ್ಯರ ವರ್ಗಗಳು, ಅವರು ಸಲ್ಲಿಸಬೇಕಾದ ಶುಲ್ಕ:

ಸದಸ್ಯತ್ವ ವರ್ಗ	ಶುಲ್ಕ
(ಅ) ಮಹಾ ಪೋಷಕರು	ರೂ. ೧,೦೦,೦೦೦/- (ಒಂದು ಲಕ್ಷ)
(ಆ) ಪೋಷಕರು	ರೂ. ೫೦,೦೦೦/- (ಐವತ್ತು ಸಾವಿರ)
(ಇ) ಆಜೀವ ಸದಸ್ಯರು	ರೂ ೨೫೦/- (ಇನ್ನೂರ ಐವತ್ತು)
(ಈ) ಮಹಾ ಪೋಷಕ ಸಂಸ್ಥೆಗಳು	ರೂ. ೨,೦೦,೦೦೦ (ಎರಡು ಲಕ್ಷ)
(ಉ) ಪೋಷಕ ಸಂಸ್ಥೆಗಳು	ರೂ. ೧,೦೦,೦೦೦/- (ಒಂದು ಲಕ್ಷ)
(ಊ) ಸದಸ್ಯ/ದಾನಿ ಸಂಸ್ಥೆಗಳು	ರೂ. ೨೫,೦೦೦/- (ಇಪ್ಪತ್ತೈದು ಸಾವಿರ)
(ಋ) ಯಾವುದೇ ಶಿಕ್ಷಣ ಸಂಸ್ಥೆಗಳಲ್ಲಿ ಅಸ್ತಿತ್ವದಲ್ಲಿ ಇರುವ ಸಂಘ-ಸಂಸ್ಥೆ	ರೂ. ೫,೦೦೦/- (ಐದು ಸಾವಿರ)
(ಎ) ಭಾರತೀಯ ಸೇನೆ, ಅರೆಸೇನೆಯಲ್ಲಿ ಸೇವೆ ಸಲ್ಲಿಸುತ್ತಿರುವ / ನಿವೃತ್ತರಾಗಿರುವ ಕನ್ನಡ ಸೈನಿಕರಿಗೆ ಹಾಗೂ ದಿವ್ಯಾಂಗಚೇತನರಿಗೆ ಆಜೀವ ಸದಸ್ಯತ್ವವನ್ನು ಮತ್ತು ಸ್ಮಾರ್ಟ್ ಕಾರ್ಡನ್ನು ಶುಲ್ಕರಹಿತ(ಉಚಿತ)ವಾಗಿ ನೀಡತಕ್ಕದ್ದು.
(ಏ) ಹೊರದೇಶದ ಕನ್ನಡಿಗರು ಅಮೆರಿಕದ ೧೦ ಡಾಲರುಗಳಿಗೆ ಸರಿಸಮಾನವಾದ ಭಾರತದ ರೂಪಾಯಿಗಳನ್ನು ಆಜೀವ ಸದಸ್ಯತ್ವದ ಶುಲ್ಕವಾಗಿ ಪಾವತಿಸತಕ್ಕದ್ದು.

ಸದಸ್ಯತ್ವ ಪಡೆಯುವ ಪ್ರಕ್ರಿಯೆ::

(೧) ಸದಸ್ಯತ್ವ ಪಡೆಯಬಯಸುವ ಆಯಾ ವರ್ಗಗಳ ವ್ಯಕ್ತಿಗಳು ಹಾಗೂ ಸಂಸ್ಥೆಗಳು ನೇರವಾಗಿ, ಪರಿಷತ್ತಿನ ಜಾಲತಾಣ (ವೆಬ್ಸೈಟ್) / ಮೊಬೈಲ್ ಆ್ಯಪ್ ಮೂಲಕ ನಿಗದಿಪಡಿಸಿರುವ ನಮೂನೆಯಲ್ಲಿ ಅರ್ಜಿಯನ್ನು ಭರ್ತಿಮಾಡಿ, ಅಗತ್ಯ ದಾಖಲೆಗಳನ್ನು ಲಗತ್ತಿಸಿ ಆನ್ಲೈನ್ ಮೂಲಕ ಶುಲ್ಕವನ್ನು ಪಾವತಿಸತಕ್ಕದ್ದು. ಇಂತಹ ಅರ್ಜಿಯನ್ನು ಹಾಗೂ ದಾಖಲೆಗಳು, ಭಾವಚಿತ್ರಗಳನ್ನು ಕನ್ನಡ ಸಾಹಿತ್ಯ ಪರಿಷತ್ತು ಪರಿಶೀಲಿಸಿದ ನಂತರ ಸದಸ್ಯತ್ವವನ್ನು ನೀಡಲಾಗುವುದು.

(೨) ಈಗಾಗಲೇ ಸದಸ್ಯತ್ವ ಪಡೆದು ಗುರುತಿನ ಚೀಟಿ ಹೊಂದಿದವರು, ಅಪೇಕ್ಷೆಪಟ್ಟಲ್ಲಿ ಹಾಗೂ ಹೊಸದಾಗಿ ಸದಸ್ಯತ್ವ ಪಡೆಯುವವರು ಆಧುನಿಕ ಗುರುತಿನ ಚೀಟಿ ‘ಸ್ಮಾರ್ಟ್ ಕಾರ್ಡ್’ಅನ್ನು ಕಡ್ಡಾಯವಾಗಿ ಪಡೆಯತಕ್ಕದ್ದು. ಈ ಸಂಬಂಧ ರೂ. ೧೫೦-೦೦ (ಒಂದುನೂರ ಐವತ್ತು ರೂಪಾಯಿ) ಗಳನ್ನು ಹೆಚ್ಚುವರಿಯಾಗಿ (ಆಧುನಿಕ ʻಸ್ಮಾರ್ಟ್ ಕಾರ್ಡ್’ ವೆಚ್ಚ ಮತ್ತು ಅಂಚೆ ವೆಚ್ಚ ಸೇರಿ) ಪಾವತಿಸಬೇಕಾಗುತ್ತದೆ. ಯಾವುದೇ ಕಾರಣಕ್ಕೂ ಈ 'ಸ್ಮಾರ್ಟ್ ಕಾರ್ಡ್’ ಅನ್ನು ದುರ್ಬಳಕೆ ಮಾಡಿಕೊಳ್ಳುವಂತಿಲ್ಲ.

(೩) ಪರಿಷತ್ತಿನಿಂದ ಪ್ರಕಟಣೆಗೊಳ್ಳುತ್ತಿರುವ ‘ಕನ್ನಡ ನುಡಿ’ ಪತ್ರಿಕೆಯನ್ನು ಎಲ್ಲ ಸದಸ್ಯರುಗಳು ಉಚಿತವಾಗಿ ಆ್ಯಪ್ / ಜಾಲತಾಣದ ಮೂಲಕ ಪಡೆಯಬಹುದು.

(೪) ಸದಸ್ಯತ್ವ ಒಮ್ಮೆ ಅಂಗೀಕಾರವಾದ ನಂತರ ಅದರ ಶುಲ್ಕವನ್ನು ಯಾವುದೇ ಕಾರಣಕ್ಕೂ ಹಿಂತಿರುಗಿಸುವಂತಿಲ್ಲ.

(೫) ಸಾಮಾನ್ಯ / ವಿಶೇಷ ಸಭೆಯಲ್ಲಿ ಭಾಗವಹಿಸಲು ಮತ್ತು ಇಂಥ ಸಭೆಗಳಲ್ಲಿ ಹಾಗೂ ಚುನಾವಣೆಯಲ್ಲಿ ಮತದಾನ ಮಾಡಲು ಅಲ್ಲದೇ ಪರಿಷತ್ತಿನ ಕಾರ್ಯಚಟುವಟಿಕೆಗಳಲ್ಲಿ ಭಾಗವಹಿಸಲು ಸದಸ್ಯರು ಪರಿಷತ್ತಿನ ಗುರುತಿನ ಚೀಟಿ/ಸ್ಮಾರ್ಟ್ ಕಾರ್ಡ್ ಅನ್ನು ಹೊಂದಿರಬೇಕು. ಗುರುತಿನ ಚೀಟಿ/ಸ್ಮಾರ್ಟ್ ಕಾರ್ಡ್ ಹೊಂದದೆ ಇರುವವರು ಜನತಾ ಪ್ರಾತಿನಿಧ್ಯ ಕಾಯ್ದೆಯಲ್ಲಿ ಸೂಚಿಸಿರುವ ಗುರುತಿನ ಚೀಟಿಯಲ್ಲಿ ಒಂದನ್ನು ತೋರಿಸಿ ಮತದಾನ ಹಾಗೂ ಸದಸ್ಯರ ಸಭೆಯಲ್ಲಿ ಭಾಗವಹಿಸುವುದು.

(೬) ಯಾವುದೇ ಸದಸ್ಯನ ಅಥವಾ ಸದಸ್ಯ ಸಂಸ್ಥೆಯ ವರ್ತನೆಯು ಪರಿಷತ್ತಿನ ಘನತೆ, ಗೌರವಗಳಿಗೆ ಹಾಗೂ ಧ್ಯೇಯೋದ್ದೇಶಗಳಿಗೆ ವಿರುದ್ದವಾಗಿದ್ದುದು ಕಂಡುಬಂದಲ್ಲಿ, ಅಂತಹ ಸದಸ್ಯರಿಂದ ಅಥವಾ ಸದಸ್ಯ ಸಂಸ್ಥೆಯಿಂದ ವಿವರಣೆಯನ್ನು ಪಡೆದು, ಪರಿಶೀಲನೆ ಮಾಡಿ ಮೇಲ್ನೋಟಕ್ಕೆ ಆರೋಪ ಸರಿ ಇದೆ ಎಂದು ಕಂಡುಬಂದಲ್ಲಿ, ಅಂತಹ ವ್ಯಕ್ತಿಯ / ಸಂಸ್ಥೆಯ ಸದಸ್ಯತ್ವವನ್ನು ಮುಂದಿನ ಆದೇಶದವರೆಗೆ ಅಮಾನತ್ತಿನಲ್ಲಿರಿಸುವ ಅಧಿಕಾರವು ಕೇಂದ್ರ ಪರಿಷತ್ತಿನ ಅಧ್ಯಕ್ಷರಿಗೆ ಇರತಕ್ಕದ್ದು. ಈ ಸಂಬಂಧ ತಮ್ಮ ನಿರ್ಣಯಕ್ಕೆ ಅಧ್ಯಕ್ಷರು ಕಾರ್ಯಕಾರಿ ಸಮಿತಿ ಸಭೆಯ ಅನುಮೋದನೆ ಪಡೆಯಬೇಕು.

(೭) ಕಾರ್ಯಕಾರಿ ಸಮಿತಿಯ ಅಥವಾ ಆಜೀವ ಸದಸ್ಯರಲ್ಲಿ ಯಾರಾದರೂ ಅಪರಾಧಿಕ ಅಪರಾಧದ ಸಂಬಂಧ ನ್ಯಾಯಾಲಯದಲ್ಲಿ ವಿಚಾರಣೆಗೆ ಒಳಗಾದಲ್ಲಿ ಅಥವಾ ಅವರು ಪರಿಷತ್ತಿನ ಘನತೆ, ಗೌರವಗಳಿಗೆ ಧಕ್ಕೆಯುಂಟು ಮಾಡಿದಲ್ಲಿ ಅಂಥವರು ಪರಿಷತ್ತಿನ ಸದಸ್ಯತ್ವದಿಂದ ಅಮಾನತ್ತು ಗೊಳಿಸಲ್ಪಡುತ್ತಾರೆ. ಅಪರಾಧಿಕ ಅಪರಾಧಗಳಿಗೆ ಶಿಕ್ಷೆಗೆ ಒಳಗಾದಲ್ಲಿ, ಅಂತಹವರಿಗೆ ಹೇಳಿಕೆ ನೀಡಲು ಅವಕಾಶ ಕಲ್ಪಿಸಿ, ಅವರು ಎಸಗಿದ ಅಪರಾಧದ ತೀಕ್ಷ್ಣತೆಯನ್ನು ಪರಿಗಣಿಸಿ, ಅವರನ್ನು ಪರಿಷತ್ತಿನ ಸದಸ್ಯತ್ವದಿಂದ ವಜಾಗೊಳಿಸಲಾಗುತ್ತದೆ.

(೮) ಯಾವುದೇ ಸದಸ್ಯ, ಸದಸ್ಯ ಸಂಸ್ಥೆಯು ಪರಿಷತ್ತಿನ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದಲ್ಲಿ ಅದನ್ನು ಅಂಗೀಕರಿಸುವ ಅಥವಾ ತಿರಸ್ಕರಿಸುವ ಅಧಿಕಾರ ಕೇಂದ್ರ ಪರಿಷತ್ತಿನ ಅಧ್ಯಕ್ಷರಿಗೆ ಇರುತ್ತದೆ. ಅಧ್ಯಕ್ಷರು ತಮ್ಮ ನಿರ್ಣಯವನ್ನು ಕಾರ್ಯಕಾರಿ ಸಮಿತಿ ಸಭೆಯಲ್ಲಿ ದಾಖಲಿಸುವುದು ಅವಶ್ಯ.

ಸದಸ್ಯರ ಮತ್ತು ಸದಸ್ಯ-ಸಂಸ್ಥೆಗಳ ಹಕ್ಕು-ಬಾಧ್ಯತೆಗಳು ಹಾಗೂ ಸೌಲಭ್ಯಗಳು::

(೧) ಪರಿಷತ್ತಿನ ಉತ್ಸವ, ಉಪನ್ಯಾಸ, ಗೋಷ್ಠಿ, ಸಮ್ಮೇಳನ ಇತ್ಯಾದಿ ಕಾರ್ಯಕ್ರಮಗಳಲ್ಲಿ ಹಾಜರಾಗುವ ಮಹಾಪೋಷಕರು, ಪೋಷಕರು ಹಾಗೂ ಮಹಾಪೋಷಕ ಸಂಸ್ಥೆ / ಪೋಷಕ ಸಂಸ್ಥೆಯ ಪ್ರತಿನಿಧಿಯೊಬ್ಬರಿಗೆ, ದಾನಿಗಳಿಗೆ, ದಾನಿ ಸಂಸ್ಥೆಗಳ ಪ್ರತಿನಿಧಿಯೊಬ್ಬರಿಗೆ ವೇದಿಕೆಯ ಮುಂಭಾಗದಲ್ಲಿ ಸೂಕ್ತ ಆಸನದ ವ್ಯವಸ್ಥೆ ಮಾಡಿ ಅವರನ್ನು ಗೌರವಿಸುವುದು.

(೨) ಎಲ್ಲ ವರ್ಗಗಳ ಸದಸ್ಯರೂ ಪರಿಷತ್ತಿನ ಆಜೀವ ಸದಸ್ಯರೆಂದು ಪರಿಗಣಿಸಲ್ಪಟ್ಟು ಅವರು ಪುಸ್ತಕ ಭಂಡಾರ, ವಾಚನಾಲಯ ಮೊದಲಾದವುಗಳ ಸೌಲಭ್ಯಗಳನ್ನು ಪಡೆಯಲು ಹಾಗೂ ಚುನಾವಣಾ ನಿಯಮಗಳಿಗೆ ಒಳಪಟ್ಟು ಚುನಾವಣೆಗಳಲ್ಲಿ ಮತದಾನ ಮಾಡಲು ಅರ್ಹರಾಗಿರುತ್ತಾರೆ.

(೩) ಪರಿಷತ್ತಿನ ಪ್ರಕಟಣೆಗಳ ಕುರಿತಾಗಿ ಸದಸ್ಯರಿಗೆ ವಿಶೇಷ ರಿಯಾಯತಿ ನೀಡಲಾಗುವುದು.

(೪) (ಅ) ಯಾವುದೇ ಸದಸ್ಯನು ಕೇಂದ್ರ ಪರಿಷತ್ತಿನ ಅಥವಾ ತನಗೆ ಸಂಬಂಧಿಸಿದ ಘಟಕದ ಕಾರ್ಯಕಾರಿ ಸಮಿತಿಯ ಯಾವುದೇ ನಿರ್ಣಯದಿಂದ / ಗೊತ್ತುವಳಿಯಿಂದ ಬಾಧಿತನಾದಲ್ಲಿ ಅಂತಹ ಸದಸ್ಯನು ವಾರ್ಷಿಕ / ವಿಶೇಷ ಸಾಮಾನ್ಯ ಸಭೆಗೆ ಮೇಲ್ಮನವಿಯನ್ನು ಸಲ್ಲಿಸುವ ಹಕ್ಕು ಹೊಂದಿರುತ್ತಾನೆ.

(ಆ) ಪ್ರತಿ ಅರ್ಹ ಸದಸ್ಯರಿಗೆ ಸಾಮಾನ್ಯ ಸಭೆಯಲ್ಲಿ / ವಿಶೇಷ ಸಭೆಯಲ್ಲಿ / ಚುನಾವಣೆಯಲ್ಲಿ ಮತದಾನ ಮಾಡುವ ಸಂದರ್ಭದಲ್ಲಿ ಒಂದೇ ಮತ ಚಲಾಯಿಸಲು ಅವಕಾಶವಿರತಕ್ಕದ್ದು.

(೭) ಯಾವುದೇ ಸಭೆಯಲ್ಲಿ ಯಾವುದೇ ವಿಷಯಕ್ಕೆ ಸಂಬಂಧಿಸಿದಂತೆ ಪರ ಮತ್ತು ವಿರೋಧವಾಗಿ ಸಮಾನ ಮತಗಳು ಬಂದಲ್ಲಿ ಆ ಸಭೆಯ ಅಧ್ಯಕ್ಷರಿಗೆ ಹೆಚ್ಚುವರಿಯಾಗಿ ಒಂದು ನಿರ್ಣಾಯಕ ಮತವನ್ನು ಚಲಾಯಿಸಲು ಅಧಿಕಾರ ಇರತಕ್ಕದ್ದು.